Zaqatala Regional Qaz İstismar İdarəsinin (RQİİ) Şəki Qaz İstismar Sahəsinin (QİS) kollektivi qaz təsərrufatında təhlükəsizlik texnikası qaydalarını rəhbər tutaraq, qəzaların və bədbəxt hadisələrin qarşısının alınması istiqamətində əhəmiyyətli işlər görür, qəzaların başvermə səbəblərinin araşdırılmasını təmin edir, təhlil nəticəsində onları yarada bilən səbəblərin aradan qaldırılması üçün tədbirlər görür.
Sahə rəisi, təcrübəli mütəxəssis Hamlet Şamil oğlu Qasımov xidmətlərin işini və onların bir – biri ilə qarşılıqlı münasibətini səmərəli təşkil edir, istehsalın yüksək inkişafı və təkmiləşdirilməsi sahəsində məqsədəuyğun fəaliyyətlərini istiqamətləndirir.
Sahə üzrə işçilərin iş yerlərinin vəziyyətinə ciddi nəzarət olunur, onların bilik və təcrübəsindən səmərəli istifadə edilməsi, əmək üçün təhlükəsiz və əlverişli şərait yaradılması, ətraf mühitin qorunması üzrə təlimatların tələblərinə riayət olunması təmin edilir.
İdarədə xidmətlər üzrə müəyyən olunmuş hesabatların vaxtında tərtib edilərək aidiyyəti üzrə təqdim olunmasına, işçilərin işə davamiyyətinə, aylıq iş vaxtının uçotu tabellərinin və iş qrafiklərinin düzgün tərtib olunmasına və kərgüzarlıq işlərinə əmək və istehsalat intizamının yüksək səviyyədə saxlanılmasına, Azərbaycan Respublikasının qüvvədə olan qanunvericiliyinə, o cümlədən əmək qanunvericiliyinə və idarə üzrə təsdiq edilmiş “ Daxili intizam Qaydaları “na riayət edilməsinə effektiv nəzarət həyata keçirilir.
Təbii qazın qəbulu və istehlakçıların texniki təhlükəsizlik norma və qaydalarına uyğun fasiləsiz təbii qazla təmin edilməsi ciddiliklə diqqət mərkəzində saxlanılır. İstismar müddətini başa vuran şkaflar yenisi ilə dəyişdirilir, erroziyaya uğrayan daşıyıcı və paylayıcı qaz xəttləri yeni politelin borularla əvəzlənir, sayğaclar quraşdırılır.
Məlum olduğu kimi, SOCAR “Azəriqaz” İB-nin baş direktoru Ruslan Əliyev mayın 23-də Şəki şəhərində vətəndaşlarla görüş keçirib. Qəbulda Şəki sakinləri ilə yanaşı, Qax, Zaqatala və Oğuz rayonlarından da qatılan vətəndaşların problem və təklifləri dinlənilib. Ruslan Əliyevlə görüşən Şəki sakinlərinin problem və təklifləri barədə baş direktordan tövsiyə və tapşırıqlar alan QİS rəisi Hamlet Qasımov dərhal onların icrasına yönəlik tədbirləri başladıb.
Malik Mustafayev
