Macarıstan Türkiyəni etibarlı tranzit tərəfdaşı hesab edir.
Bu barədə Macarıstanın xarici işlər naziri Peter Siyarto “X” hesabında türkiyəli həmkarı Hakan Fidanla görüşünü şərh edərkən bildirib.
“Türkiyə-Macarıstan Birgə Məsləhət Mexanizminin ilk iclası bu gün xarici işlər və müdafiə nazirlərinin, milli təhlükəsizlik müşavirləri və böyük hərbi şirkətlərin rəhbərlərinin iştirakı ilə keçirildi. Biz Ukrayna müharibəsinin danışıqlar yolu ilə həll olunmasını dəstəkləyən Türkiyə ilə həmrəyik və enerji təminatı marşrutlarına hücumları qınayırıq. Fərqi yoxdur bu hücumlar Rusiyadakı neft borularını hədəfə alır, yoxsa Qara dənizdəki tankerləri. Türkiyə etibarlı və ədalətli tranzit tərəfdaşıdır. Bu il, təxminən 8 milyard kub metr qaz “Türk axını” boru xətti ilə Macarıstana nəql ediləcək”, – Siyarto qeyd edib.
