Pandemiya dövründə bizim üçün prioritet məsələ insanların sağlamlığı və onların sosial müdafiəsinin təmin edilməsidir.
Prezident İlham Əliyev bu fikirləri Qoşulmama Hərəkatının Təmas Qrupu formatında videokonfrans vasitəsilə keçirilən Zirvə görüşündəki giriş nitqində bildirib.
Ölkəmizdə koronavirusla mübarizə və xəstələrin müalicəsi istiqamətində həyata keçirilən tədbirlərdən danışan dövlətimizin başçısı deyib: “Azərbaycanda koronavirus xəstələrinin müalicəsi üçün 20-dən artıq xəstəxana ayrılmışdır. Virusun diaqnostikası və müalicəsi üçün zəruri olan laborator testlər, bəzi tibb avadanlığı və ləvazimatlar Azərbaycana gətirilmişdir. Testlərin aparılması üçün ölkədə 23 laboratoriya fəaliyyət göstərir. İndiyə kimi ölkə üzrə 160 mindən artıq test keçirilmişdir. Daxili tələbatı ödəmək üçün qısa müddət ərzində qoruyucu və digər tibbi ləvazimatların istehsalına başlanmışdır”.
Prezident İlham Əliyev görülmüş tədbirlər nəticəsində kütləvi yoluxma hallarının qarşısının alındığını, son üç həftə ərzində ölkəmizdə xəstəliyə yoluxanların sayı ilə sağalanların sayı arasında müsbət dinamikanın olduğunu qeyd edib.
